السلام عليكم و رحمة الله و بركاته ♥
كيف رمضان معكم؟ الله يعيده علينا وعليكم بالصحه لا فاقدين ولا مفقودين.
حبيت اتكلم عن منتجات العنايه بالبشرة، بالتحديد الوجه.
اول شي غسولات الوجه:
كلينيك liquid facial soap mild: يتحول لرغوه خفيفه و ينظف بشكل جيد. استخدمه بيدي او بفرشة pro x. ما يجفف البشرة أبدا (لكل انواع البشرة)
نيتروجينا بالقريب فروت: هذا كابوس للبشرات العاديه او الجافه. بشرتي مختلطه احسه يحرق ويجفف اذا استخدمته، بس جدا مناسب اختي يمكن لان بشرتها دهنيه، يخفف من حب الشباب.
لوريال وايت بيرفكت: قوامه غريب، يشبه كلينيك لكن احس اثقل شوي وما احس يبيض، بس ما يحسس البشرة ولا يجفف (ممكن يناسب كل انواع البشرة).
المقشرات:
اول واحد عاليسار face soap & clarity من سوب اند قلوري هو أخفهم، فممكن يستخدم يوميا. قوامه زي الجل وفيه حبيبات كبيره ينظفف بعمق ولا يسبب تهيج او تحسس للبشره.
الثاني fab pore من سوب اند قلوري، استخدمه قليل جدا لان قوامه غريب شوي. كانه كريم وفيه حبيبات لكن مو كثيره. احس يناسب للأنف والخدين أكثر شي.
الثالث بعد من سوب اند قلوري اسمه scrub your nose in it: هذا اذا ودك تصحصحين استخدميه الصبح، كانه معجون اسنان مننعششش!! حبيباته جدا صغيره ويبرد الوجه.
هذي صوره ل fab pore و scrub your nose in it
أخر واحد كليراسيل، هذا اول منتج يغير بشرتي بكم يوم. مادري ليه ما رجعت اشتريه يوم خلص!! احس بشرتي اشتاقت له!
اختفت الحبوب من وجهي من اول اسبوع استعمال اذا بشرتك مو جافه ممكن تستخدميه يوميا بدون مشاكل. (تنوية: ما عندي حب شباب اتكلم عن البثور الهرمونيه فقط)
الأقنعه:
هذي اخليها لأيام الروقان او قبل المناسبات. لان كلها مو متوفره بالأسواق هنا :(
قلام قلو Glam Glow: هذا اول مره استخدمه جتني روعه. حسيته يحرق. بس بعدها تعودت عليه. ميزته لما ينشف تشوفين نقط الدهون اللي يشفطها من بشرتك واحساسه جدا بارد عالوجه. احطه كم دقيقه واذا جف وبدا يتكسر خذت فوطه صغيره حطيت فيها شوي مويه ودلكت وجهي بشكل دوائر.
سعره شوي مبالغ فيه، اللي عندي عينه. اذا خلص بشتري قناع طين عادي. بالأخير هو مجرد قناع طين :)
الأبيض Malin + Goetz مكتوب من صفاته انه يتخلص من السموم. من الارشادات بعد استمعاله ممكن تغسليه او تتركينه لترطيب أقوى. أستخدمه اذا حسيت بشرتي جافه واتركه عليها. اول ما احطه يتحول لرغوه وبعدها تختفي ويصير كانه كريم غني. محافظه عليه لان سعره حدود ٤٠$ :(
قناع الخيار من فريمان: هذا جدداااا احبه وسعره جدا مناسب بحدود ٤$. احط طبقه خفيفه تجف بكم دقيقه واشيله من الاطراف. يشيل معه بعض الرؤوس وشعيرات الوجه الصغيره. من الحين مفكره اخذ روائح ثانيه منه لانه ببساطه يهبل!!
كريمات الوجه:
نيفيا سوفت: مررره حلو بدون عطور وترطيبه جميل، اذا بتستخدميه لوجهك انصحك بالعلبه اللي تنضغط مو هذي، لان بعد فتره وقفت استعمله لوجهي خفت اجتمعت فيه جراثيم.
mac strobe cream: استخدمه قبل المكياج. يعطي حياه واضاءه للوجه بدون glitter/shimmer وترطيبه حلو ومكوناته أحلى كلها مفيده للبشره.
Clinique Dramatically Different Lotion: قوامه خفيف واحساسه حلو عالبشره، ميزته لو احطه قبل النوم اصحى الصبح وانا حاسه بالترطيب!
بديت احرص عليهم هالفتره لان فوائدهم كثيره ويخفف من أثر تقدم البشره، قبل تقدمها لازم يستمر عليه طبعا.
كل الأثنين مكوناتهم طبيعيه. لكن قوامهم غير.
Nourish Organic: عباره عن زيت برائحه البرتقال. استخدمه قبل الكريم واحس يزيد الترطيب وينعم البشره. لكن ما استمريت عليه فتره طويله عشان احكم على فعاليته.
Jurlique: قوامه كانه كريم لكن خفيف جدا وبرائحه الزهور. اول ما احطه احس بشرتي تتحسس من رائحه الزهور بس هذا الاحساس كم ثانيه ويزول. ما حبيته زي الاول لكن يفي بالغرض و الشركه معروفه باستخدامها مواد طبيعيه.
مناديل ازاله المكياج:
استخدم مناديل اطفال من صيدلية بوتس، ليش؟ اول شي تناسب الاطفال يعني اكيد مافيها عطور وما تسبب حساسيه.
وثانيا ٤ علب ب ٢٠ ريال!! يعني تكفيني بالقليل ٤ شهور.
هي اول خطوه بازاله المكياج، بعدها استخدم غسول وجه، و بايودرما لازاله المتبقي من مكياج العيون.
التونيك (toner):
التونر عباره عن سائل يمسح على البشره بعد غسلها، يساعد على موازنه ph البشره ويخفف ظهور البثور.
كلينيك: فيه منه ٤ مستويات، ١ للبشره الحساسه الى ٤ للبشره الدهنيه جدا. اخذت رقم ٢، احسه عباره عن كحول بعلبه. هو اهم محتوياته الكحول اصلا! فعال لانه يعقم البشره بعد، بس ما استخدمه الا مرتين او ثلاث بالأسبوع لانه قوي. استخدمه بقطنه واتجنب منطقه العين.
بايودرما: هذا عاد افضل تونر/مزير مكياج بالنسبه لي، بالذات مكياج العيون. جدا خفيف وبلا عطور ويناسب كل البشرات، فيه منه نوع ثاني بعد للبشره الحساسه بس ما جربته. استخدمه بقطنه على كل وجهي، ممكن ٤ قطرات تفكي كامل الوجه.
Olay Pro X cleansing system
نسيت اصور لكم حقتي، اخذت صوره من قوقل.
جدا جدا احبها سعرها جدا مناسب واعتقد متوفره بساكو؟
اخذتها من امازون العام ب ٢٠$ مع فرشتين زياده ٨$. البطاريه اللي جت معاها للحين ماخلصت!
استخدمها من مرتين الى ثلاث مرات بالاسبوع. او لازاله المكياج اللي يكون ثقيل.
انصحكم فيها بشده!!
اتمنى ما طولت عليكم و افدتكم بشي.
أي استفسار او ملاحظه تقدرون تكتبون لي بالتعليقات تحت او عالانستقرام.
وشكرا♥
ليست هناك تعليقات:
إرسال تعليق